هيءُ مختلف نظرين ۽ خاص طور پرڏيهي پاليسيءَ جي حوالي سان استعمال ٿيندڙ اصطلاح آهي. هن صورتحال ۾ هڪ رياست دُنيا جي ٻين رياستن سان پنهنجا سياسي ، معاشي ، فوجي ، سفارتي ، واپاري ۽ ثقافتي لاڳاپا تمام گهڻا گهٽائي يا مڪمل طور ختم ڪري ڇڏيندي آهي. انهيءَ صورتحال جو عملي مُظاهرو ڪندي، هڪ رياست بين الاقوامي نظام ۾ موجود سگهارين ڌُرين کان جاگرافيائي حوالن سان پاڻ کي جُدا ڪري، فقط پنهنجن وسيلن تي ڀاڙڻ لڳندي آهي. اهڙي رياست ٻيءَ ڌُر يا رياست سان سياسي، سفارتي يا فوجي ناتن جي بحاليءَ کان لنوائيندي پاڻ کي وڌيڪ محفوظ سمجهندي آهي. اها پاليسي ڪا ننڍي رياست وڏي رياست جي ڏاڍ کان بچڻ يا وڏي رياست ٻين رياستن جي اهميت کي نظرانداز ڪندي اختيار ڪندي آهي. هن ڏس ۾ آمريڪي صدر ’ جارج واشنگٽن‘ جون 1789ع کان مارچ 1799ع تائين اها پاليسي اختيار ڪندي، آمريڪا طرفان ڪنهن ٻئي مُلڪ سان ڪنهن به قسم جي ”مستقل اتحاد“ ڪرڻ کان ڪيٻايو. ساڳي طرح جاپان 1936ع تائين يورپي مُلڪن جي گڏيل حڪمت عمليءَ جو حصو ٿيڻ کان پاسيرو رهيو. هيءُ نظريو اوڀر يورپ جي مُلڪن طرفان، اولهه يورپ جي مُلڪن سان لاڳاپن ۾ ٿڌائپ يا سرد مهريءَ جي حوالي سان به ڪافي مشهور هيو. هيءُ نظريو عدم مداخلت ۽ تڪرار کان پنهنجو وجود بچائڻ وارن ٻن نُڪتن تي بيٺل آهي